بسم الله الرحمن الرحيم
السلام عليكم ورحمة الله وبركاته
يلا ياجماعه موضوعنا الليله موضوع مهم جدا
وظاهرة متفشيه شديد
ظاهرة القنبره فى الضلله وتحت الشجر
كان جنب البيوت
ولله جنب الدكاكين
ياجماعه الظاهرة دى من وجهه نظرى انا
كامرة ظاهرة ماجميله
والله بتخجلنا
يعنى الواحده فينا لمن تكون طالعه
وتقرب لمحل الشجره القاعدين فيها الرجال
شعرت جلدا كلها بتقوم
وبتكون ماشه زى الماشه بالرموت كنترول
ومرات امكن تقع
ياجماعه مرات الناس ديل بيكونو رجال كبار نزلوا المعاش وقاعدين
يتونسو ويتسامرو فى الضل
ديل جدودنا وابواتنا واعمامنا وخيلانا ماقلنا حاجه
وبرضو فى رجال كبار بقعدو فى الضل بيكونو فارقين
عندنا قعده الضل الاشد خطرا
قعده الشباب
فيهم خريجين الجامعات العاطلين لسه ما لقو شغل
وفيهم خريجين الثانوى الماركو فى جامعات
وفيهم الماعندهم اى قرايه
حااديكم صورة من ارقى حى فى الخرطوم
جنب احد الدكاكين وجنبو اشجار ظليله
فى اى وقت من اليوم بتلقاه مليان بالاولاد
ماتقولو لى ديل زباين الدكان ديل اولاد الحله
نحن بنعرفم وبنعرف اهلم
فيهم الشله البتونسو
وفيهم الفاتحين موبايلاتم متلمين فيها
وفيهم البياكلو
وفيهم البشربو
وهذه الجلسات تستمر الى انصاص الليالى
ما معروف بالليل بحصل شنو
ان بعض منهم يقال انهم يروجون للمخدرات
فى صباح يوم من الايام
والحله فى هدوء تام
اذ بنا نسمع صراخ وكواريك
تحت فى البنايه التى نسكن بها
قمنا مفزوعين ونزلنا لنرى الحاصل
وعندها وجدت الحله كلها تحت اتت على صوت الصراخ
فاذ بى اجد ربه المنزل وبناتها ومعهم جارتم يبكون
هى ما لكم المات منو
قالو لم يمت احد
ولكن ولدم وولد الجيران سلو السكاكين لبعض عايزين يطاعونو
تحت الشجرة امام الدكان
واتت واحدة من نساء الحى بالخبر
انتو قاعدين اولادكم سالين السكاكين
وبدءت الام وبناتا بالسكلى السمعناهو داك
الولدين خريجين جامعه لم يجدوا عمل
وجيران اتربو من صغار فى الحله سوا
لكن ما السر الذى بينهم
ليسلو السكاكين قالو دى المرة التانيه يعملو كدا
هل عرفتو السبب ؟
انا عرفت السبب
السبب
البنات
بينبزو اخوات بعض
واحد فيهم نبذ للتانى اختو
وداك ما قصر طوالى فته ليهو اختو
طبعا ما فى راجل برضى فى اختو كلام فارغ
وبعد داك حصل الحصل
بعد جابوهم الاتنين مارقين من
اوضه كانو قاعدين معاهم الرجال الكبار
ملابسم مشرطه تلحلف تقول كانو فى حرب
وقالو خلاص صالحوهم عشان خاطر اهلم
كبار وعيانين عندهم ضغط وسكرى
لانو البنات لمن كانو بيصرخو
كانو بيصرخو خايفين على امهم قالوا عندها سكرى
ووقعت
انا اليوم داك بكيت كتير وبالجد خفته
نحن عندنا اولاد وربنا يقدرنا على تربيتم
فى الغابه دى
ويومها ام واحد من الاولاد المتشكلين
قالت لى دا كلو من قعاد الضلله
رائكم شنو ياجماعه فى قعاد الضلله
ودمتم
موضوع: ظاهرة القنبره فى الضلله وتحت الشجر 
السبت أكتوبر 10, 2009 11:50 pm
ة